Diwrnod Shwmae Su’mae 2025
13 diwrnod yn ôl
Cofiwch ddweud 'Shwmae' ddydd Mercher (15 Hydref) fel rhan o ddiwrnod Shwmae Su'mae.
Mae'r ymgyrch genedlaethol flynyddol yn annog pawb i ddefnyddio'r Gymraeg, drwy ddechrau pob sgwrs gyda 'Shwmae'.
Nod y diwrnod yw dangos bod yr iaith Gymraeg yn perthyn i bawb boed yn siaradwyr rhugl, dysgwyr neu rai sy'n swil ynghylch eu Cymraeg, felly ewch amdani!
Cofiwch fod gennym nifer o gyfleoedd i'ch helpu i ddysgu, ymarfer a gwella eich sgiliau Cymraeg. P'un a ydych chi'n ddechreuwr llwyr, eisiau magu mwy o hyder neu wella eich sgiliau ysgrifenedig, mae cwrs ar gael i chi. Gallwch ddarganfod mwy am yr holl gyrsiau a chymorth ar ein tudalen Dysgu a Datblygu ar y fewnrwyd.
Pam mae gwrando yn eich helpu i ddysgu'n gyflymach
Os ydych chi'n awyddus i gynyddu eich hyder yn y Gymraeg, un o'r pethau hawsaf a mwyaf effeithiol y gallwch ei wneud yw gwrando:
· Mae ymchwil yn dangos bod yr ymennydd yn adnabod patrymau sain mewn iaith newydd ar ôl ychydig oriau o wrando, hyd yn oed cyn i chi allu dweud y geiriau.
· Gwell ynganiad – Mae gwrando'n rheolaidd yn eich helpu i godi rhythm naturiol, goslef, a synau cynnil y Gymraeg sy'n anodd eu dysgu wrth ddarllen yn unig.
· Rhoi hwb i ddealltwriaeth – Po fwyaf rydych chi'n clywed Cymraeg mewn cyd-destunau bob dydd (radio, podlediadau, teledu), yr hawsaf fydd hi i'ch ymennydd gysylltu ystyron â synau, gan wneud siarad a darllen yn llawer mwy naturiol.
Hwyluso Dysgu
Peidiwch ag anghofio, mae gan Thinqi amrywiaeth o fodiwlau Cymraeg ar gael i staff. Mae'r gwersi byr, ymarferol hyn yn berffaith os hoffech fagu hyder wrth gyfarch pobl, wrth sgwrsio bob dydd, ac mewn Cymraeg yn y gweithle ar eich cyflymder eich hun. Beth am fewngofnodi heddiw a rhoi cynnig ar fodiwl cyflym?
Cyngor Da: Gwylio gyda Chymraeg
A wyddech chi fod llawer o raglenni ar BBC iPlayer ar gael gydag opsiwn dwyieithog. Mae newid i sain neu isdeitlau Cymraeg yn ffordd syml o roi hwb i'ch sgiliau gwrando wrth fwynhau eich hoff raglenni.
I ddathlu, eleni rydym wedi lansio cefndir Hydref/Gaeaf Teams newydd o Lwybr Dyffryn Tywi yn Dryslwyn a fydd hefyd yn dangos yn amlwg os ydych chi'n siaradwr Cymraeg neu'n ddysgwr. Ewch i'r dudalen Marchnata a'r Cyfryngau ar y fewnrwyd i weld y cefndir newydd.
I ddathlu eleni rydyn ni'n cynnal Clwb Clebran arbennig gyda Fin Gough a Sioned Cray – y pâr ieuengaf hyd yma i gymryd rhan yn rhaglen Race Around the World y BBC.
Bydd hwn yn gyfle gwych i gwrdd â nhw a chlywed am eu profiadau, beth ddysgon nhw ar hyd y daith a beth sydd nesaf i'r pâr!
Dewch i'r Clwb Clebran ddydd Mawrth, 21 Hydref am 12.30pm-1.30pm ar Teams.