Gwybod eich Rhifau: Gwella Iechyd y Galon

Eich calon yw’r grym tu ôl i’r egni a'r angerdd yn eich  gwaith – a’ch bywyd. Gall cymryd ychydig funudau i ddeall iechyd eich calon wneud gwahaniaeth enfawr – gan eich helpu i fyw'n gryfach, yn hirach, a gyda mwy o egni.

Pam ddylech chi ofalu am eich calon?

Gellir atal y rhan fwyaf o broblemau'r galon. Mae gwybod eich "rhifau" yn golygu eich bod chi'n ymateb i risgiau cyn iddynt ddod yn rhai difrifol.

Beth yw "eich rhifau" beth bynnag?

Meddyliwch am y rhain fel ystadegau hanfodol eich calon - cliwiau syml, pwerus am iechyd eich calon:

·    Pwysedd Gwaed: Anelwch at fod o dan 120/80 mmHg. Mae rhifau uchel yn golygu bod eich calon yn gweithio’n rhy galed, gan gynyddu eich risg o drawiad ar y galon neu strôc.

·    Colesterol: Cadwch gyfanswm y colesterol o dan 5 mmol/L. Gall gormod o golesterol "drwg" rwystro'ch rhydwelïau a'ch arafu.

·    Lefel Siwgr Gwaed: Mae lefel siwgr gwaed o dan 5.6 mmol/L ar ôl ymprydio yn cadw diabetes - a phroblemau  yn ymwneud â’r galon - draw.

·    Mynegai Màs y Corff (BMI): Arhoswch rhwng 18.5 a 24.9. Mynd dros hynny? Gallai gynyddu eich risg o rai problemau iechyd y gellir eu hatal.

·    Cylchedd y Canol: Dros 94cm i ddynion ac 80cm i fenywod? Mae'n rhybudd - hyd yn oed os yw'ch BMI yn edrych yn iawn.

Sut i garu eich calon yn fwy bob dydd

·       1.  Trefnu Archwiliad - Heddiw: Heb gael sgriniad iechyd ers dros flwyddyn? Peidiwch ag oedi. Trefnwch un gyda'ch meddyg teulu neu galwch heibio i'ch fferyllfa leol - maent yn aml yn cynnig archwiliadau cyflym, cyfleus ynghylch iechyd y galon.

·       2.  Cadw Golwg: Cofnodwch eich rhifau. Gwyliwch am newidiadau a'u rhannu gyda'ch meddyg.

·       3.  Bwyta, Symud, Ffynnu: Llenwch eich plât â ffrwythau a llysiau. Symudwch am o leiaf 150 munud yr wythnos – boed yn gerdded, dawnsio, beicio, beth bynnag sy'n eich helpu i symud! Torrwch yn ôl ar halen, siwgr, a brasterau nad ydynt yn iach.

·       4.  Rhoi’r gorau i arferion nad ydynt yn iach: Os ydych chi'n ysmygu, nawr yw'r amser i roi'r gorau iddi. Angen help? Mae digon o adnoddau i'ch cefnogi. Cadwch lygad ar faint o alcohol rydych chi’n ei yfed  hefyd.

·       5.  Ymlacio a Magu Nerth: Gall straen gael effaith ar ein calon. Dewch o hyd i amser i ymlacio, mwynhau hobïau, a chysgu am 7-9 awr y nos.

Pam mae Archwiliadau Rheolaidd yn Bwysig

Nid yw pwysedd gwaed a cholesterol yn aml yn dangos symptomau nes eu bod yn dod yn ddifrifol. Mae archwiliadau rheolaidd yn tynnu sylw at y rhain yn gynnar, gan eich galluogi i weithredu.

Ble i gael archwiliad?

Cofiwch y gallwch gael archwiliad iechyd am ddim yn eich meddygfa neu’ch fferyllfa leol - ffordd syml, gyfleus o gadw golwg ar iechyd eich calon heb unrhyw gost.

Os hoffech gael profion manylach, mae'r IGP hefyd yn cynnig disgownt ar wasanaethau iechyd y galon y mis hwn. Gall eu profion gwaed arbenigol ac ECG ganfod arwyddion rhybudd cynnar, a darparu adborth wedi'i bersonoli ar ôl pob archwiliad. Trefnwch eich apwyntiad nawr yma www.theigp.co.uk/ccc

I gael rhagor o wybodaeth am iechyd y galon, ewch i Sefydliad Prydeinig y Galon

Gellir dod o hyd i unrhyw gymorth a chefnogaeth arall ar ein tudalennau iechyd a llesiant