Wythnos Maeth a Hydradiad 2026
11 awr yn ôl
Mae Wythnos Maeth a Hydradiad 2026 yn ymgyrch genedlaethol sy'n tynnu sylw at bwysigrwydd bwyd a diod da ar gyfer iechyd a llesiant. Mae'n dod â darparwyr iechyd a gofal cymdeithasol, ysgolion, grwpiau cymunedol a gweithleoedd ynghyd i godi ymwybyddiaeth o sut mae maeth a hydradiad priodol yn cefnogi pobl ym mhob cyfnod mewn bywyd.
Yn 2026, mae'r ymgyrch yn parhau i bwysleisio y gall newidiadau bach wneud gwahaniaeth mawr. Mae bwyta prydau rheolaidd, gan gynnwys amrywiaeth o ffrwythau a llysiau, grawn cyflawn, bwydydd protein a chynnyrch llaeth neu ddewisiadau eraill, yn helpu'r corff i gael y maetholion sydd eu hangen arno. Mae yfed digon o ddŵr a diodydd eraill sy'n isel mewn siwgr eraill yn helpu i gynnal egni, canolbwyntio ac iechyd yn gyffredinol.
Awgrymiadau ar gyfer gofalu am eich maeth a'ch hydradiad yn y gwaith
Gall gweithwyr gymryd camau syml i ddiogelu eu hiechyd eu hunain yn ystod y diwrnod gwaith:
- Dechrau'r diwrnod gyda brecwast – Gall brecwast cytbwys wella'r gallu i ganolbwyntio a lleihau'r demtasiwn i fwyta bwydydd llawn siwgr yn nes ymlaen.
- Cynllunio ymlaen llaw – Mae dod â chinio a byrbrydau iach o gartref yn ei gwneud hi'n haws osgoi opsiynau cyfleus llai maethlon.
- Cadw potel ddŵr gerllaw – Mae cael dŵr o fewn cyrraedd yn ffordd syml i'ch atgoffa chi i yfed yn rheolaidd trwy gydol y dydd.
- Gosod negeseuon atgoffa i yfed – Os ydych chi'n anghofio'n aml, gosodwch neges atgoffa ar eich ffôn neu cysylltwch yfed dŵr gyda thasgau rheolaidd, fel gwirio e-byst.
- Cymryd seibiannau priodol – Gall camu i ffwrdd o'ch desg i fwyta'n ystyriol wella treuliad ac eich helpu chi i adnabod pryd rydych chi'n teimlo'n llawn.
- Cadw llygad am arwyddion o ddadhydradu – Gall pen tost, blinder ac wrin tywyll i gyd fod yn arwyddion bod angen i chi yfed mwy o hylifau.
Yn anad dim, mae'r neges yn glir: mae bwyd a diod yn hanfodol i iechyd. Drwy wneud newidiadau bach, cyson, gall unigolion wella eu llesiant a'u perfformiad yn y gwaith a thu hwnt.
I gael rhagor o wybodaeth am iechyd a llesiant, anfonwch e-bost at iechydallesiant@sirgar.gov.uk