Polisi Teledu Cylch Cyfyng Corfforaethol - Mawrth 2026

2. Amcanion

2.1. Mae'n bwysig bod pawb, ac yn enwedig y rhai sy'n gyfrifol am weithredu'r systemau teledu cylch cyfyng ar ran y Cyngor, yn deall yr union reswm dros gyflwyno pob un o'r systemau teledu cylch cyfyng a phob camera sy'n rhan o'r system a'r hyn y dylid ac na ddylid defnyddio’r camerâu ar ei gyfer. 
 
2.2. Bydd gan bob system teledu cylch cyfyng ei hamcanion ei hun sy'n benodol i'r safle neu'r dasg. Gallai'r rhain gynnwys rhai neu'r cwbl o'r canlynol:  
 
•    Diogelu ardaloedd a safleoedd y mae swyddogion y cyngor a'r cyhoedd yn eu defnyddio. 
•    Canfod ac atal troseddau ac ymddygiad gwrthgymdeithasol. 
•    Cynorthwyo i adnabod troseddwyr a'u dal. 
•    Ceisio atal ymddygiad treisgar neu ymosodol tuag at swyddogion y cyngor. 
•    Rheoli traffig gan gynnwys traffig ar y safle a rheoli meysydd parcio. 
•    Gorfodi rheolau traffig. 
•    Amddiffyn eiddo ac asedau'r cyngor. 
•    Cynorthwyo o ran achwyniadau, cwynion ffurfiol ac ymchwiliadau. 
•    Monitro amgylcheddau gweithredol.

3. Deddfwriaeth

3.1  Mae systemau teledu cylch cyfyng yn destun deddfwriaeth o dan y canlynol: 
 
•    Deddf Diogelu Data 2018 
•    Rheoliad Cyffredinol ar Ddiogelu Data y DU 
•    Deddf Hawliau Dynol 1998  
•    Deddf Rhyddid Gwybodaeth 2000  
•    Deddf Diogelu Rhyddidau 2012 (DEDDF DIOGELU RHYDDIDAU 2012). 
•    Deddf Gweithdrefn ac Ymchwiliadau Troseddol 1996 • Deddf Rheoleiddio Pwerau Ymchwilio 2000 (RIPA). 
•    Deddf Camddefnyddio Cyfrifiaduron 1990. 
•    Deddf Iechyd a Diogelwch yn y Gwaith 1974.

4. Cyfrifoldebau

4.1.    Yr Uwch-berchennog Risg Gwybodaeth 
 
4.1.1. Mae'r Uwch-berchennog Risg Gwybodaeth yn sicrhau dull corfforaethol tuag at gyfrifoldebau'r Cyngor sy'n deillio o Ddeddf Diogelu Rhyddidau 2012. Mae ganddo gyfrifoldeb strategol am uniondeb ac effeithiolrwydd y prosesau sydd ar waith, sy'n sicrhau cydymffurfiaeth mewn perthynas â'r holl gamerâu gwyliadwriaeth y mae'r Cyngor yn eu gweithredu. 
 
4.1.2. Bydd yr Uwch-berchennog Risg Gwybodaeth yn sicrhau bod Templedi Hunanasesu ac Asesiadau o’r Effaith ar Ddiogelu Data yn cael eu cyhoeddi ar y wefan a'u bod yn cael eu hadolygu bob blwyddyn. 
 
4.1.3. Bydd yr Uwch-berchennog Risg Gwybodaeth yn arwain o ran ardystiad trydydd parti i ddarparu tystiolaeth o gydymffurfiaeth â Chôd Ymarfer y Comisiynydd Camerâu Gwyliadwriaeth.  
  
4.2.    Pwynt Cyswllt Unigol Teledu Cylch Cyfyng  
 
4.2.1. Mae'r Pwynt Cyswllt Unigol Teledu Cylch Cyfyng yn gyfrifol am oruchwylio'r holl agweddau ar gamerâu gwyliadwriaeth. Mae'n sicrhau bod pawb sy'n ymwneud â'r defnydd o systemau teledu cylch cyfyng yn ymwybodol o'r ddeddfwriaeth a'r canllawiau cyfredol mewn perthynas â'r systemau hyn. Mae gwybodaeth a manylion cyswllt ar gyfer y Pwynt Cyswllt Unigol Teledu Cylch Cyfyng ar fewnrwyd y Cyngor. 
  
4.3.    Penaethiaid Gwasanaeth  
 
4.3.1. Y Pennaeth Gwasanaeth perthnasol sydd â chyfrifoldeb cyffredinol am systemau teledu cylch cyfyng. Mae hyn yn cynnwys sicrhau bod yr holl staff perthnasol yn cael yr hyfforddiant priodol a bod yr holl systemau'n cael eu defnyddio yn unol â'r polisi hwn.  
 
4.3.2. Bydd Penaethiaid Gwasanaeth yn enwebu Swyddog Arweiniol Teledu Cylch Cyfyng y Gwasanaeth a fydd yn cyfathrebu â gweithredwyr teledu cylch cyfyng y system. 
 
4.4.    Swyddogion Arweiniol Teledu Cylch Cyfyng y Gwasanaeth 
 
4.4.1. Bydd Swyddogion Arweiniol Teledu Cylch Cyfyng Arweiniol y Gwasanaeth yn goruchwylio'r holl systemau teledu cylch cyfyng y mae'r gwasanaeth yn eu rheoli. Byddant hefyd yn bwynt cyswllt canolog ac yn cynnig cyngor i staff mewn perthynas ag ymholiadau.  Byddant yn gyfrifol am sicrhau bod Templedi Hunanasesu ar waith ar gyfer yr holl systemau, bod yr Asesiadau o’r Effaith ar Ddiogelu Data yn berthnasol i'r holl systemau a bod y dogfennau hyn yn cael eu hadolygu bob blwyddyn ac yn cael eu cyhoeddi.  
 
4.4.2. Bydd Swyddogion Arweiniol y Gwasanaeth yn sicrhau y cymerir y camau angenrheidiol cyn gosod system newydd neu wneud newidiadau i systemau presennol, gan gynnwys cwblhau mynegiant o ddiddordeb ac ymgynghori. Gweler yr adran teledu cylch cyfyng  ar y fewnrwyd am ragor o fanylion. 
 
4.4.3. Swyddog Arweiniol dynodedig y Gwasanaeth fydd yn gyfrifol am weithrediad dyddiol pob system teledu cylch cyfyng. Bydd rhestr o'r holl systemau a'u swyddogion perthnasol ar y dudalen teledu cylch cyfyng ar fewnrwyd y Cyngor, y mae'n rhaid i'r Swyddogion Arweiniol ei diweddaru'n rheolaidd. Mae hyn yn berthnasol i drydydd partïon sy'n gweithredu o dan gyfarwyddyd y Cyngor. 
 
4.4.4. Bydd Swyddog Arweiniol y Gwasanaeth yn sicrhau bod swyddogion y cyngor sy'n ymwneud â gweithredu'r system teledu cylch cyfyng yn cael hyfforddiant i ddefnyddio'r offer a'u bod yn ymwybodol o'r polisi hwn a'r gweithdrefnau sydd ar waith i reoli systemau teledu cylch cyfyng o fewn y cyngor. 
 
4.4.5. Dylai Swyddog Arweiniol y Gwasanaeth weithredu fel y pwynt cyswllt cyntaf ar gyfer yr holl ymholiadau sy'n berthnasol i'r system teledu cylch cyfyng, a dylai sicrhau mai dim ond swyddogion awdurdodedig y cyngor sy'n gallu gweithredu neu weld delweddau. 
 
4.4.6. Bydd Swyddog Arweiniol y Gwasanaeth yn ymchwilio i unrhyw camddefnydd honedig o system teledu cylch cyfyng ac yn rhoi gwybod amdano ar unwaith i'r pwynt cyswllt unigol teledu cylch cyfyng. 
 
4.4.7. Bydd Swyddog Arweiniol y Gwasanaeth yn sicrhau bod y system teledu cylch cyfyng yn weithredol ac yn cymryd camau i fynd i'r afael ag unrhyw ddiffygion fel y bo'n briodol. 
 
4.4.8. Bydd Swyddogion Arweiniol Gwasanaethau yn sicrhau y cymerir y camau angenrheidiol cyn gosod system newydd neu wneud newidiadau i systemau presennol, gan gynnwys cwblhau mynegiant o ddiddordeb ac ymgynghori.  
 
4.5.    Gweithredwyr Teledu Cylch Cyfyng 
 
4.5.1. Rhaid i swyddogion y cyngor sy'n gweithredu systemau teledu cylch cyfyng gydymffurfio â deddfwriaeth bresennol, y polisi hwn, canllawiau, codau ymarfer a llawlyfrau lleol. Rhaid iddynt wybod gofynion GDPR y DU a'r Ddeddf Diogelu Data a chwblhau cwrs eDdysgu y Cyngor ynghylch y rheoliadau hyn.  
 
4.5.2. Bydd swyddogion y cyngor sy'n ymwneud â'r defnydd o systemau teledu cylch cyfyng yn rhoi gwybod am unrhyw gamddefnydd i Swyddog Arweiniol Teledu Cylch Cyfyng y Gwasanaeth a bydd yn cydweithio ag unrhyw ymchwiliad. Bydd Swyddog Arweiniol y Gwasanaeth yn rhoi gwybod amdano ar unwaith i'r pwynt cyswllt unigol teledu cylch cyfyng ac yn ymchwilio i unrhyw gamddefnydd honedig o system teledu cylch cyfyng. 
 
4.5.3. Bydd swyddogion y cyngor sy'n gweithredu systemau teledu cylch cyfyng yn gyfrifol am roi gwybod ar unwaith i Swyddog Arweiniol y Gwasanaeth am unrhyw ddiffygion i offer. 
 
4.5.4. Mae nifer o systemau teledu cylch cyfyng y Cyngor wedi'u lleoli ar safleoedd a ddefnyddir gan drydydd partïon. Yn yr achosion hyn, mae'n bwysig bod dealltwriaeth glir rhwng y Cyngor a'r sefydliad(au) dan sylw o ran pwy sy'n gyfrifol am bob agwedd ar y system teledu cylch cyfyng. Dylai hyn gael ei gofnodi a'i lofnodi gan y ddau barti. Dylid rhoi copi o'r ddogfen hon i bwynt cyswllt unigol teledu cylch cyfyng y cyngor.

5. Prynu a Defnyddio Camerâu Teledu Cylch Cyfyng

5.1. Cyn gweithredu unrhyw systemau teledu cylch cyfyng newydd, neu sydd wedi'u newid yn sylweddol, at ddefnydd y Cyngor (gan gynnwys camerâu gwisg a chamerâu wedi'u gosod ar gerbydau), rhaid iddynt gael eu gymeradwyo'n ffurfiol gan yr Uwch-berchennog Risg Gwybodaeth neu ei ddirprwy enwebedig.

Rhaid i'r broses gymeradwyo hon fod yn unol â gweithdrefn Mynegi Diddordeb y Cyngor, fel y nodir yn yr adran teledu cylch cyfyng ar y fewnrwyd Teledu Cylch Cyfyng (CCTV).
 
5.2. Bydd y broses Mynegi Diddordeb yn dilyn gweithdrefn llywodraethu Eiddo Corfforaethol, a fydd yn rhan o gymeradwyo ceisiadau am osod systemau newydd er mwyn sicrhau cydymffurfiaeth â gofynion Iechyd a Diogelwch yn y Gwaith. 
 
5.3. Ni chaniateir caffael, gosod neu weithredu system teledu cylch cyfyng heb gwblhau'r broses Mynegi Diddordeb a chael awdurdodiad yr Uwch-berchennog Risg Gwybodaeth. 
 
5.4. Rhaid i'r rheiny sy'n gyfrifol am gyflwyno a gweithredu'r systemau teledu cylch cyfyng sicrhau bod y defnydd o gamerâu yn gymesur i'r amcan arfaethedig a bod hawl unigolion i breifatrwydd yn cael ei pharchu bob amser. Rhaid cwblhau'r Mynegiant o Ddiddordeb gydag amcan gweithredol clir ar gyfer y system teledu cylch cyfyng gan wirio'r  DPIA perthnasol i sicrhau ei fod yn cwmpasu'r system. 
 
5.5. Rhaid cymryd gofal i sicrhau nad yw camerâu yn dal delweddau neu seiniau o leoedd preifat megis tai preifat. 
 
5.6. Ni chaniateir i gamerâu cudd gael eu defnyddio o dan nawdd y polisi hwn. Mae gweithgareddau o'r fath yn dod o fewn cwmpas Deddf Rheoleiddio Pwerau Ymchwilio (RIPA) neu'n rhannol ac mae'n rhaid cael awdurdodiad ar gyfer gweithgaredd o'r fath o dan y gweithdrefnau RIPA perthnasol. Fel arfer, dylai systemau teledu cylch cyfyng fod yn glir gydag arwyddion gweladwy wedi'u lleoli'n agos at y ddyfais yn hysbysu'r rhai yn y cyffiniau eu bod yn cael eu monitro a/neu eu recordio. Gall cynnwys arwydd neu hysbysiad o'r fath amrywio yn ôl natur y ddyfais sy'n cael ei defnyddio, yr ardal y mae'n cael ei defnyddio ynddi a diben ei defnyddio. 
 
5.7. Mae'r Cyngor yn nodi y gallai camerâu ffug weithredu fel dull atal, a dylai ceisiadau i'w defnyddio fynd drwy'r broses Mynegi Diddordeb ac asesu risg, gan ystyried y cyfiawnhad a ddarperir. 
 
5.8. Dim ond wrth fynedfeydd sy'n eiddo i'r cyngor, pwyntiau mynediad staff yn unig a chownteri gwasanaeth cyhoeddus dynodedig y gellir defnyddio camerâu clychau drws clyfar. Rhaid cymeradwyo gosod drwy'r broses Mynegi Diddordeb a'i gofnodi yn y gofrestr teledu cylch cyfyng ganolog. Rhaid i bob defnydd gynnwys arwyddion, a rhaid iddynt gydymffurfio ag asesiadau o'r effaith ar breifatrwydd. 
 
5.9. Yn achos systemau teledu cylch cyfyng sydd â'r gallu i symud, gogwyddo a chwyddo, bydd angen cyfiawnhad i'w caffael, eu gosod a'u gweithredu, gan ddibynnu ar natur y safle, lefel bosibl y tarfu ar breifatrwydd, a'r diben a'r angen amdanynt. Ni fyddant yn cael eu gosod fel rheol.  
 
5.10. Ar ôl cyflwyno system teledu cylch cyfyng sefydlog, rhaid anfon map sy'n dangos lleoliad y camera at y pwynt cyswllt unigol teledu cylch cyfyng i'w gynnwys ar gofrestr ganolog y Cyngor o systemau teledu cylch cyfyng.  
 
5.11. Rhaid ystyried y defnydd o systemau teledu cylch cyfyng fel rhan o waith cynllunio, adeiladu neu adnewyddu. Dylid cael cyngor gan Swyddog Dylunio i Atal Troseddau Heddlu Dyfed-Powys. Dylid rhannu awdurdodiad ar gyfer defnyddio systemau teledu cylch cyfyng yn gynnar wrth ddylunio adeiladau gyda'r Pennaeth Gwasanaeth y mae'r adeilad yn cael ei adeiladu ar ei gyfer. Y rheswm dros hyn yw y gellir cymhwyso'r polisi hwn a mabwysiadu dull amgen, neu system teledu cylch cyfyng dderbyniol sy'n rhan o'r dyluniadau. Dylid cadw gwybodaeth am y system teledu cylch cyfyng fel rhan o'r ffeil sy'n ymwneud â'r adeilad wedi'i gwblhau.

6. Monitro

6.1. Mae monitorau teledu cylch cyfyng mewn mannau cyhoeddus ar gyfer gwyliadwriaeth fyw. Dylid asesu ymarferoldeb y gosodiadau hyn yn unigol, gan ystyried y gofynion busnes a gweithredol, yn ogystal â phenderfynu ar y personél priodol ac aelodau o'r cyhoedd sy'n gallu gweld y fideos.  
 
6.2. Dim ond y rhai sydd wedi'u hawdurdodi gan Swyddog Arweiniol y Gwasanaeth perthnasol sy'n cael gweld recordiadau teledu cylch cyfyng. 
 
6.3. Ni chaniateir lawrlwytho recordiadau teledu cylch cyfyng heb gyflwyno a chymeradwyo cais am ddatgeliad.  
 
6.4. Bydd GDPR y DU ond yn berthnasol i deledu gylch cyfyng os yw'r recordiadau "yn ymwneud â pherson, y mae modd adnabod pwy ydyw yn uniongyrchol" ohono. 
 
6.5. Os yw GDPR y DU yn berthnasol, bydd yn ofynnol i weithredwr y teledu cylch cyfyng wneud y canlynol:  
 
6.5.1. Gosod arwyddion i roi gwybod bod teledu cylch cyfyng ar waith (gweler adran 9).
 
6.5.2. Rhowch gopïau o recordiadau ohono ei hun i unrhyw unigolyn sy'n gofyn amdano (Cais am Fynediad at Ddata gan y Testun) mewn ymgynghoriad â'r Swyddog Diogelu Data (gweler 8.2).  

6.5.3.  Sicrhau nad yw recordiadau'n cael eu cadw am gyfnod hwy o amser nag sy'n angenrheidiol at y dibenion y maent wedi'u casglu.
 
6.5.4. Sicrhau nad yw recordiadau'n cael eu datgelu i neb oni bai y caniateir hyn o dan eithriad yn Neddf Diogelu Data 2018 a GDPR y DU.  
 
6.6. Yn ogystal â'r rhwymedigaethau o dan Ddeddf Diogelu Data 2018, mae'r Ddeddf Hawliau Dynol yn ei gwneud yn ofynnol i unrhyw awdurdod cyhoeddus sy'n defnyddio camerâu teledu cylch cyfyng wneud hynny gan gydymffurfio ag Erthygl 8 o'r confensiwn.
 
6.7. Mae'r Cyngor yn defnyddio camerâu gwisg i amddiffyn swyddogion y cyngor sy'n ymdrin ag aelodau o'r cyhoedd mewn sefyllfaoedd lle maent yn arbennig o agored i gael eu cam-drin neu lle mae angen parhaus i ddal delweddau neu leisiau at ddibenion tystiolaeth. 
 
6.8. Mae manylion casglu data systemau teledu cylch cyfyng wedi'u cynnwys yn hysbysiad preifatrwydd y Cyngor ar gyfer teledu cylch cyfyng. 
 
6.9. Rhaid i fynediad o bell at systemau teledu cylch cyfyng gydymffurfio â phrotocolau corfforaethol diogel a osodir gan y tîm Gwasanaethau Digidol. Rhaid i geisiadau restru defnyddwyr a fydd yn cael mynediad ac yn cael eu cymeradwyo gan Bennaeth y Gwasanaeth a'r Uwch-berchennog Risg Gwybodaeth.

7. Gwiriadau a Sicrwydd Teledu Cylch Cyfyng

7.1. Rhaid i weithredwyr teledu cylch cyfyng gynnal gwiriadau arferol i sicrhau bod yr holl offer teledu cylch cyfyng yn gweithio'n iawn. Mae'r gwiriadau hyn yn cynnwys archwiliadau gweledol rheolaidd (e.e. wythnosol) o gamerâu, monitorau, offer recordio a systemau gweithredu cysylltiedig. Rhaid rhoi gwybod am unrhyw namau, diffygion neu broblemau perfformiad ar unwaith yn unol â gweithdrefnau rhoi gwybod am ddiffygion lleol. 
 
7.2. Mae Swyddogion Arweiniol Teledu Cylch Cyfyng y Gwasanaeth yn cynnal archwiliadau cyfnodol o'r holl systemau teledu cylch cyfyng o fewn eu maes gorchwyl i roi sicrwydd bod y systemau'n parhau'n weithredol, yn addas i'r diben, ac yn cydymffurfio â'r polisi hwn. Rhaid cwblhau'r archwiliadau hyn o leiaf unwaith y flwyddyn a rhaid iddynt gynnwys adolygu cofnodion gwirio gweithredwr, monitro'r gwaith o ddatrys diffygion, a nodi unrhyw feysydd o ddiffyg cydymffurfio. Rhaid rhoi gwybod am unrhyw ddiffyg cydymffurfio i'r Gwasanaethau Digidol, y Pwynt Cyswllt Unigol Teledu Cylch Cyfyng, neu'r Uwch-berchennog Risg Gwybodaeth. 
 
7.3. Gall Gwasanaethau Digidol drefnu a chydlynu "Gwiriadau Iechyd" teledu cylch cyfyng ffurfiol fel rhan o raglen arolygu strwythuredig. Bydd y gwiriadau iechyd hyn yn cael eu cynnal gyda Swyddogion Arweiniol Teledu Cylch Cyfyng Arweiniol y Gwasanaeth a Rheolwyr Gwasanaeth perthnasol a byddant yn asesu perfformiad, gwytnwch, diogelwch a chydymffurfiaeth y system. Pan fo'n ofynnol i gyflenwyr trydydd parti gefnogi'r gweithgaredd hwn, yr adran berthnasol fydd yn gyfrifol am dalu'r costau cysylltiedig sy'n ofynnol i gynnal cydymffurfiaeth.

8. Gwylio recordiadau

8.1. Rhaid gwylio recordiadau teledu cylch cyfyng am resymau cyfreithlon yn unig, megis anghenion gweithredol neu wyliadwriaeth a monitro ar safle i atal troseddu neu ymddygiad gwrthgymdeithasol. Bydd y Cyngor, ynghyd â Swyddog Arweiniol y Gwasanaeth, yn diffinio'r defnydd o'r system teledu cylch cyfyng fesul safle. 
 
8.2. Mae gwylio neu dreillio recordiadau yn achlysurol wedi'i wahardd yn llym. Rhaid gwylio at ddiben penodol, cyfreithlon yn unig. Rhaid rhoi gwybod am fynediad amhriodol a gall arwain at gamau disgyblu. 

8.3. O dan Erthygl 15 o GDPR y DU, mae gan wrthrychau data yr hawl i gael gafael ar wybodaeth a gedwir amdanynt gan y Cyngor ac i gael copi o'r data personol hwnnw.  Mae gan unigolion hefyd yr hawl i gael mynediad at ddelweddau ohonynt eu hunain wedi'u recordio ar systemau teledu cylch cyfyng a reolir gan y Cyngor.  Rhaid gwneud ceisiadau o'r fath yn ysgrifenedig i'r Swyddog Diogelu Data, Neuadd y Sir, Caerfyrddin, SA31 1JP  llywodraethugwybodaeth@sirgar.gov.uk  Ewch i'n wefan i gael rhagor o fanylion: Diogelu Data - Cyngor Sir Caerfyrddin.
 
8.4. Os bydd swyddog arall yn cyflwyno cais, dylai'r swyddog hwnnw gysylltu â'r Swyddog Diogelu Data i drafod y cais.   
 
8.5. Ar adegau, efallai y bydd gwasanaethau'r cyngor yn dymuno cael mynediad at ddelweddau a recordiadau ar systemau teledu cylch cyfyng fel rhan o ymchwiliad cyfreithlon i weithgareddau troseddol, hawliadau sifil, materion disgyblu posibl, cwynion, achwyniadau neu faterion iechyd a diogelwch. Dim ond ar ôl cyflwyno cais ffurfiol i Swyddog Arweiniol y Gwasanaeth y bydd delweddau yn cael eu rhyddhau i swyddog ymchwilio sydd wedi'i awdurdodi'n briodol.  Dylai'r cais am wylio gynnwys: 
 
•    Enw'r swyddog awdurdodi.  
•    Enw a manylion cyswllt y person sy'n gweld delweddau. 
•    Y rheswm dros weld y delweddau. 
 
8.6.    Mae ceisiadau'r heddlu am recordiadau yn gyffredinol yn dod o fewn yr eithriad a amlinellir yn Atodlen 2, Rhan 1, Paragraff 2 o Ddeddf Diogelu Data 2018. Mae mynediad wedi'i awdurdodi at ddibenion atal neu ganfod troseddu, neu ddal neu erlyn troseddwyr. Gall atal mynediad rwystro'r amcanion hyn, a thrwy hynny sbarduno'r eithriad a chaniatáu i ddeunydd o'r fath gael ei ryddhau. 
 
8.7.    Rhaid gwneud ceisiadau gwylio mewn modd amserol gan mai un mis yw'r cyfnod cadw ar gyfer y rhan fwyaf o systemau teledu cylch cyfyng sy'n gweithredu yn y cyngor. Mae gan swyddogion y Cyngor sy'n destun gweithdrefnau disgyblu, cwynion neu achwyniadau y cyngor yr hawl i weld a chadw recordiadau ohonynt eu hunain a gallant ofyn am gopïau fel Cais am Fynediad at Ddata gan y Testun fel yr amlinellir yn 8.3.  
 
8.8.    Ar adegau, gall swyddogion yr heddlu ofyn am weld delweddau o systemau teledu cylch cyfyng yn ystod yr ymchwiliad i weithgarwch troseddol. Caniateir hyn yn gyffredinol o dan eithriad yn GDPR y DU.  
 
8.9.    Gall cwmnïau yswiriant a chyfreithwyr ofyn am recordiadau ar gyfer hawliadau anaf personol neu hawliadau atebolrwydd cyflogwyr, yn aml oherwydd anghydfodau o ran difrod mewn meysydd parcio. Gan y gall y recordiadau adnabod gyrwyr neu gerbydau, ystyrir eu bod yn wybodaeth bersonol. Gellir gofyn am gopïau drwy Gais am Fynediad at Ddata gan y Testun i'r Swyddog Gwybodaeth a Diogelu Data (gweler 8.3). Dylid ymgynghori â'r tîm Rheoli Risg yn ôl yr angen. 
 
8.10.    Mae cofnod o'r holl ddatgeliadau yn cael ei gadw gan y Swyddog Diogelu Data am gyfnod o bum mlynedd ar ôl i'r defnydd gweinyddol gael ei gwblhau.  Bydd manylion unrhyw ddatgeliadau hefyd yn cael eu cofnodi ar y templed sy'n ymwneud â'r system sy'n cofnodi pob achlysur pan fydd delweddau'n cael eu gweld.

9. Arwyddion

9.1. Rhaid gosod arwyddion clir lle mae systemau teledu cylch cyfyng ar waith. Mae arwyddion o'r fath yn rhybuddio pobl eu bod yn mynd i mewn i ardal lle mae system teledu cylch cyfyng ar waith neu i'w hatgoffa eu bod yn dal i fod mewn ardal lle mae system teledu cylch cyfyng ar waith. Bydd arwyddion hefyd yn gweithredu fel dull atal ychwanegol. Ni ddylid arddangos arwyddion system teledu cylch cyfyng mewn ardaloedd lle nad oes camerâu teledu cylch cyfyng. 
 
9.2. Wrth ddefnyddio camerâu gwisg, rhaid i swyddogion wisgo gwisg briodol y cyngor ac arddangos hysbysiad clir ar eu dillad neu ar y ddyfais i gadarnhau eu bod yn defnyddio camera gwisg.  Bydd swyddogion bob amser yn rhoi gwybod bod unigolyn yn cael ei recordio cyn gynted ag y bydd y ddyfais yn cael ei hactifadu. 
 
9.3. Rhaid i arwyddion fod o faint priodol gan ddibynnu ar y cyd-destun. Er enghraifft, p'un a ydynt yn cael eu gweld gan gerddwyr neu yrwyr ceir. 
 
9.4. Dylai arwyddion fod yn fwy amlwg ac aml mewn ardaloedd lle mae pobl yn llai tebygol o ddisgwyl y byddant yn cael eu monitro gan system teledu cylch cyfyng. Mae hyn yn arbennig o bwysig pan fydd system ANPR yn cael ei defnyddio sy'n cwmpasu ardal fawr. 
 
9.5. Bydd arwyddion corfforaethol ar gael a fydd: 
 
9.5.1. Yn hawdd eu gweld a'u darllen.
 
9.5.2. Yn cadarnhau bod y system yn cael ei gweithredu gan y Cyngor ac yn cynnwys manylion cyswllt ar gyfer y Ganolfan Gyswllt. 

9.5.3. Yn cadarnhau a yw'r system yn cael ei recordio neu ei monitro neu'r ddau. 

9.5.4. Yn nodi'r diben ar gyfer rhoi system wyliadwriaeth ar waith.

10. Storio a Chadw

10.1. Mae recordiadau systemau teledu cylch cyfyng yn cael eu cadw am 30 diwrnod cyn cael eu trosysgrifo. 
 
10.2. Bydd mynediad at recordiadau teledu cylch cyfyng yn ddiogel yn unol â Polisi Teledu Cylch Cyfyng Corfforaethol.
 
10.3. Bydd yr holl recordiadau'n cael eu cadw'n ddiogel yn unol â Polisi Teledu Cylch Cyfyng Corfforaethol. 
 
10.4. Rhaid peidio â chadw recordiadau o gamerâu clychau drws clyfar am fwy na 30 diwrnod oni bai eu bod yn angenrheidiol ar gyfer ymchwiliad. Rhaid i'r holl recordiadau gael eu hamgryptio wrth eu storio a'u trosglwyddo. Rhaid cofnodi pob achos o gyrchu recordiadau clychau drws clyfar, gan gynnwys eu gwylio, eu copïo a'u dileu. 

10.5. Preswyliad Data a Throsglwyddiadau Rhyngwladol - Dylid storio'r holl recordiadau teledu cylch cyfyng, gan gynnwys y rhai sy'n cael eu dal gan gamerâu clychau drws clyfar, mewn canolfannau data sydd wedi'u lleoli yn y Deyrnas Unedig neu'r Ardal Economaidd Ewropeaidd (AEE), neu gyda darparwyr gwasanaeth cwmwl sy'n gwarantu preswyliad data yn y DU/AEE a chydymffurfiaeth lawn â GDPR y DU. 
 
10.6. Pan fydd recordiadau yn cael eu storio neu eu prosesu y tu allan i'r DU/AEE, rhaid i'r Cyngor sicrhau bod mesurau diogelu priodol ar waith, megis Cymalau Cytundebol Safonol, a bod hawliau a rhyddid gwrthrychau'r data yn cael eu diogelu i'r un safon ag sy'n ofynnol gan GDPR y DU. 
 
10.7. Rhaid dogfennu lleoliad yr holl storio data teledu cylch cyfyng yng nghofrestr y system a'i adolygu fel rhan o'r Asesiad Effaith ar Ddiogelu Data (DPIA). 
 
10.8. Mae'r holl recordiadau yn parhau i fod yn eiddo ac yn hawlfraint i'r Cyngor. 
 
10.9. Mae'r holl recordiadau yn nodi'r amser a'r dyddiad. 
 
10.10. Bydd yr holl gyfryngau a dyfeisiau teledu cylch cyfyng yn cael eu gwaredu'n gyfrinachol pan nad oes eu hangen mwyach, yn unol â gweithdrefn waredu'r Cyngor.  
 
10.11. Ni fydd deunydd wedi'i recordio yn cael ei werthu na'i ddefnyddio at ddibenion masnachol. 
 
10.12. Rhaid dileu recordiadau a drosglwyddir o'r recordydd teledu cylch cyfyng i liniadur y Cyngor drwy gof bach USB o'r USB unwaith y bydd y trosglwyddiad wedi'i gwblhau. 
 
10.13. I gael rhagor o wybodaeth, gweler polisi'r Cyngor ar Drin data personol.

11. Technolegau Gwyliadwriaeth Uwch

11.1. Ar hyn o bryd nid yw'r Cyngor yn caniatáu defnyddio dadansoddeg sy'n seiliedig ar AI na thechnolegau adnabod wynebau o fewn ei systemau teledu cylch cyfyng. Rhaid i unrhyw ddefnydd o dechnolegau o'r fath yn y dyfodol fod yn destun Asesiad Effaith Diogelu Data (DPIA), adolygiad moesegol, a rhaid iddynt gael eu cymeradwyo'n ffurfiol gan yr Uwch-berchennog Risg Gwybodaeth. Mae hyn yn cynnwys systemau sy'n gallu adnabod drwy fiometreg, dadansoddi ymddygiad, neu wneud penderfyniadau awtomataidd.

12. Archwiliadau

12.1. Gall yr unigolion canlynol archwilio systemau teledu cylch cyfyng sy'n eiddo i'r Cyngor ar unrhyw adeg: 
 
•    Yr Uwch-berchennog Risg Gwybodaeth. 
•    Y Pwynt Cyswllt Unigol Teledu Cylch Cyfyng. 
•    Swyddog Arweiniol Teledu Cylch Cyfyng y Gwasanaeth perthnasol. 
•    Y Pennaeth Gwasanaeth perthnasol neu ei gynrychiolydd enwebedig. 
•    Aelod o'r corff rheoleiddio perthnasol.

13. Iechyd a Diogelwch

13.1. Dylid darllen y polisi hwn ar y cyd â Pholisi Iechyd a Diogelwch y Cyngor, sydd i'w weld drwy fynd i Polisi Lechyd a Diolgelwch.

13.2. Mae systemau teledu cylch cyfyng, gan gynnwys camerâu sefydlog a chamerâu gwisg, yn rhan o ddull y sefydliad o gefnogi iechyd a diogelwch ar draws safleoedd a gweithgareddau. Er y gall teledu cylch cyfyng helpu i atal ymddygiadau anniogel neu helpu i nodi peryglon, ni ddylid dibynnu arno i atal digwyddiadau rhag digwydd. Yn hytrach, gall recordiadau teledu cylch cyfyng ddarparu tystiolaeth werthfawr i gynorthwyo gydag ymchwiliadau ar ôl y digwyddiad, gan alluogi dealltwriaeth gliriach o ddigwyddiadau a chyfrannu at ddatblygu mesurau diogelwch gwell. Bydd mynediad at deledu cylch cyfyng at ddibenion ymchwilio yn cael ei reoli yn unol â'r polisi hwn a gofynion diogelu data cysylltiedig. Dylid defnyddio asesiadau risg i ystyried a yw'r defnydd o deledu cylch cyfyng neu gamerâu gwisg yn briodol neu'n angenrheidiol ar gyfer monitro gweithgareddau penodol neu mewn amgylcheddau penodol. Rhaid gofyn am gyngor gan y Tîm Iechyd a Diogelwch i sicrhau bod gosod a gweithredu systemau teledu cylch cyfyng mewn asesiadau risg yn gymesur, wedi'i gyfiawnhau ac yn cydymffurfio â deddfwriaeth a gweithdrefnau sefydliadol perthnasol.

14. Mesur cydymffurfiaeth

14.1. Mae cydymffurfio â'r polisi hwn yn orfodol a bydd y Gweithgor Swyddogion Teledu Cylch Cyfyng a'r Grŵp Llywodraethu Seiber a Gwybodaeth yn monitro hyn. Gall unrhyw achosion o dorri'r polisi hwn gan staff arwain at fesurau disgyblu.

15. Gwarchodwr

15.1. Cyfrifoldeb y Gwasanaethau Digidol yw sicrhau bod y polisi hwn yn cael ei adolygu a'i ddiweddaru’n rheolaidd.

16. Cwynion

16.1. Ymdrinnir ag unrhyw gwynion ynghylch systemau teledu cylch cyfyng a weithredir gan y Cyngor yn unol â Pholisi Cwynion y Cyngor.

17. Hanes y Fersiwn