Cyngor i weithwyr sy'n gyrru

Yswiriant Cerbyd Modur

Er bod cerbydau'r Cyngor wedi'u hyswirio gan yr awdurdod, nid yw'r yswiriant yn dileu cyfrifoldebau cyfreithiol personol y gyrrwr. Mae gyrwyr yn parhau i fod yn gyfrifol am eu gweithredoedd eu hunain wrth yrru, gan gynnwys cydymffurfio â deddfwriaeth traffig ffyrdd a gofynion yswiriant. Er y bydd hawliadau am gerbydau sy'n perthyn i'r Cyngor yn cael eu cwmpasu gan Bolisi Yswiriant Cerbyd Modur y Cyngor, byddai disgwyl i'r gyrwyr ddatgelu eu rhan mewn damwain i’w hyswiriwr personol fel rhan o'u datganiad o ffeithiau. Hefyd, mae gyrwyr yn cael eu hannog i drafod eu defnydd o gerbyd gyda'u hyswiriwr eu hunain, datgelu eu hamgylchiadau unigol a derbyn argymhelliad personol gan eu tanysgrifennwr, sy'n berthnasol i'w safonau tanysgrifennu. Dylai gyrwyr hefyd fod yn ymwybodol o'r canlynol:

-          RHAID iddyn nhw lenwi'r Ffurflen Hawlio Digwyddiad Modur (gweler y ffurflen atodedig) ar gyfer unrhyw ddigwyddiad sy'n digwydd wrth yrru un o gerbydau’r Cyngor. Gall methu â llenwi'r ffurflen ddigwyddiad golygu bod yswiriwr trydydd parti yn penderfynu bod gyrrwr y Cyngor yn atebol a gall effeithio ar yswiriant cerbyd modur personol y gyrrwr.

-          Mae Cardiau Damwain newydd wedi'u hargraffu. Mae'r rhain yn cynnwys manylion am Bolisi Yswiriant Cerbyd Modur y Cyngor a lle fel y gallwch gasglu'r manylion sydd eu hangen gan unrhyw barti arall sy'n rhan o ddigwyddiad cerbyd modur. Mae copïau o'r Cardiau Damwain ar gael gan Dîm y Fflyd yn Nhrostre.

-          Os nad yw hawliad yn cynnwys trydydd parti a bod gwerth y difrod yn llai na £1000, rhaid cwblhau'r Ffurflen Hawlio Digwyddiad Cerbyd Modur o hyd fel tystiolaeth o ddiwydrwydd dyladwy a chydymffurfiaeth â gweithdrefnau mewnol. Fodd bynnag, ni fydd digwyddiadau o'r fath yn mynd trwy yswiriant y Cyngor cyn belled â'u bod yn cael eu setlo o dan £1,000.

-          Pan fo damwain neu ddigwyddiad yn cael ei achosi gan weithredoedd neu esgeulustod y gyrrwr, gall y gyrrwr fod yn atebol yn bersonol am ddifrod, anaf neu golledion sy'n deillio o hynny. Bydd hyn yn cael ei asesu fesul achos.

-          Mae angen datgan unrhyw ddigwyddiad o'r fath i yswiriwr cerbyd modur personol y gyrrwr fel rhan o'i ddatganiad o ffeithiau, a gall effeithio ar delerau / premiwm a gynigir gan yr yswiriwr cerbyd modur personol.

-          Argymhellir i yrwyr ddatgelu i'w hyswiriwr personol eu bod yn gyrru cerbyd sy'n eiddo i gyflogwr at ddibenion gwaith.

-          Gall methu â gwneud datgeliadau gofynnol arwain at annilysu yswiriant, gan arwain at ganlyniadau ariannol a chyfreithiol personol i'r gyrrwr.

Pan fydd gweithwyr yn gyrru eu cerbyd preifat eu hunain fel rhan o'u swydd, rhaid iddyn nhw sicrhau bod ganddyn nhw'r yswiriant Defnydd Busnes priodol ar eu hyswiriant personol. Rhaid i weithwyr ddangos copi o'u hyswiriant dilys i’w Rheolwr Llinell. Rhaid i weithwyr roi wybod i'r Cyngor ar unwaith am unrhyw newidiadau trwyddedu neu yswiriant. Ni fydd y Cyngor yn derbyn atebolrwydd am hawliadau nad ydyn nhw wedi'u cwmpasu gan yswiriant y gyrrwr ei hun, wrth ymwneud â busnes y Cyngor.

Ffurflen Ôl-drafodaeth Digwyddiad

Ar ôl unrhyw ddigwyddiad cerbyd modur, dylid cynnal Ôl-drafodaeth Digwyddiad rhwng y gyrrwr a'i oruchwylydd. Diben hyn yw sicrhau bod pob digwyddiad yn cael ei adolygu i sicrhau bod mesurau addas yn cael eu rhoi ar waith i geisio atal digwyddiadau yn y dyfodol.

Gwirio Trwyddedau Gyrru

Mae'r broses ar gyfer gwirio Trwydded Yrru gweithwyr wedi newid. Rhaid i unrhyw staff sy'n gyrru cerbydau'r Cyngor neu'n gyrru eu cerbyd eu hunain at ddefnydd busnes, gael eu manylion wedi'u cofnodi'n ganolog ar System Rheoli Fflyd y Cyngor, Key2 (Jaama). Gweler yr Hysbysiad Prosesu Teg Jaama atodedig sy'n nodi’r rheswm pam mae angen eich gwybodaeth, pa mor hir y caiff ei chadw, gyda phwy y mae'n cael ei rhannu a pha wybodaeth sy'n cael ei storio.

Pan fydd  y wybodaeth ofynnol am y gyrrwr wedi'i darparu i Dîm y Fflyd, bydd staff yn cael e-ddatganiad drwy e-bost i gytuno arno fel y bydd eu trwydded yrru wedyn yn cael ei gwirio'n awtomatig o bryd i'w gilydd. Os ydych chi'n gyrru fel rhan o'ch rôl, ond nad ydych wedi cofrestru i'r system newydd eto, cysylltwch â'ch rheolwr llinell fel y gall anfon y wybodaeth angenrheidiol at:

fleetcompliance@sirgar.gov.uk

Gwiriadau Cydymffurfiaeth y Fflyd

I sicrhau bod y Cyngor yn bodloni gofynion ei Drwydded Gweithredwyr Nwyddau Trwm ac yn cadw at y Llawlyfr Gyrwyr, bydd Gwiriadau Cydymffurfiaeth yn cael eu cynnal gan Dîm Cydymffurfiaeth y Fflyd mewn depos a safleoedd Cyngor Sir Caerfyrddin. Gellir mynd i'r afael ag unrhyw broblemau posibl wedyn trwy hyfforddiant, mentora, sgyrsiau ynghylch iechyd a diogelwch ac ati.

Os oes gennych unrhyw gwestiynau neu ymholiadau ynglŷn â gyrru fel rhan o'ch rôl, anfonwch e-bost at fleetcompliance@sirgar.gov.uk