Canllawiau Ynghylch Contract Cyfnod Penodol/Dros Dro - Awst 2026
Yn yr adran hon
- 1. Cyflwyniad
- 2. Pwrpas
- 3. Cwmpas
- 4. Y Gwahaniaethau Rhwng Contract Cyfnod Penodol a Chontract Dros Dro
- 5. Gweithwyr Achlysurol
- 6. Defnydd Olynol o Gontractau Cyfnod Penodol/Dros Dro
- 7. Cyhoeddi Contractau Cyfnod Penodol/ Dros Dro
- 8. Hawliau Gweithwyr Cyfnod Penodol/Dros Dro
- 9. Cyfnod Penodol/Dros Dro ac Ailstrywthuro
- 10. Gweithwyr Cyfnod Penodol/Dros Dro sy'n Gwneud Cais am Secondiadau
- 11. Dewis y Swyddi i'w Dileu
- 12. Taliad Dileu Swydd
- 13. Gwasanaeth Di-dor
- 14. Cyrchu Swyddi Parhaol
- 15. Adnewyddu a Pheidio ag Adnewyddu Contractau Penodol/Dros Dro
- 16. Adolygu Contractau Cyfnod Penodol/Dros Dro
- 17. Adnewyddu Contract Cyfnod Penodol/Dros Dro
- 18. Peidio ag Adnewyddu Contract Cyfnod Penodol/Dros Dro
- 19. Sicrhau Cyfle Cyfartal
- Atodiad A - Holi ac Ateb Ynghylch Ailstrwythuro a Chontractau Cyfnod Penodol/Dros Dro
- Atodiad B - Llythyr Gwahodd o ran Ymgynghori ynghylch Contract Cyfnod Penodol/Dros Dro
1. Cyflwyniad
Ysgrifennwyd y canllawiau hyn yn unol â gofynion deddfwriaethol ac felly mae'n berthnasol i holl weithwyr Cyngor Sir Caerfyrddin ac mewn ysgolion ac mae'n rhoi arweiniad i'r holl Benaethiaid a'r rheolwyr sydd â chyfrifoldeb dros staff o ran cyflwyno a rheoli contractau cyfnod penodol/dros dro.
Penaethiaid, Penaethiaid Gwasanaeth a Rheolwyr sy'n gyfrifol am bennu natur y contract cyflogaeth ar gyfer yr holl staff ac mae'n hanfodol bod rhesymau tryloyw a gwrthrychol dros gytuno bod swydd yn un dros dro neu'n un am gyfnod penodol yn hytrach na bod yn swydd barhaol.
Y brif ddeddfwriaeth sy'n effeithio ar weithwyr cyfnod penodol/dros dro yw Rheoliadau Gweithwyr Cyfnod Penodol (Atal Triniaeth Lai Ffafriol) 2002 (O.S. 2022/2034), a ddaeth i rym ym mis Hydref 2002, a Rheoliadau Gweithwyr Cyfnod Penodol (Atal Triniaeth Lai Ffafriol) (Diwygio) 2008.
Yn ôl y Rheoliadau:
Mae gan weithwyr cyfnod penodol hawl i beidio â chael eu trin yn llai ffafriol na gweithwyr parhaol eraill, oni bai bod y driniaeth lai ffafriol wedi'i chyfiawnhau ar sail wrthrychol;
Bydd triniaeth unrhyw weithiwr cyfnod penodol yn cael ei chymharu â thriniaeth unrhyw weithiwr parhaol sy'n gwneud yr un gwaith neu waith tebyg i'r un cyflogwr;
Ni ddylai gweithwyr cyfnod penodol gael eu cyflogi ar gyfres o gontractau cyfnod penodol olynol y tu hwnt i 4 blynedd;
Ni all gweithwyr cyfnod penodol ildio'u hawl statudol i honni eu bod wedi'u diswyddo'n annheg neu gael taliadau dileu swyddi os bydd eu swyddi'n cael eu dileu ar ddiwedd eu contractau.
Gall gweithwyr cyfnod penodol ofyn am ddatganiad ysgrifenedig yn cadarnhau bod eu contractau'n rhai parhaol neu'n nodi cyfiawnhad gwrthrychol dros ddefnyddio contract tymor penodol y tu hwnt i'r cyfnod o bedair blynedd. Rhaid darparu'r datganiad ysgrifenedig cyn pen 21 diwrnod ar ôl y cais.
Trwy ddilyn y cyngor a roddir, gall yr Awdurdod/ysgol sicrhau defnydd priodol o gontractau cyfnod penodol neu dros dro, a lleihau'r risg o ran honiadau'n cael eu gwneud ynghylch diswyddo annheg a chwynion ynghylch triniaeth anghyfartal.