Polisi a Gweithdrefn Galluogrwydd - Mehefin 2026

1. Cyflwyniad

“Galluogrwydd" yw gallu gweithiwr i gyflawni'r gwaith sy'n ofynnol at safon dderbyniol, gan gyfeirio at fedr, addasrwydd, iechyd neu unrhyw nodweddion corfforol neu feddyliol eraill.

Lluniwyd y Polisi hwn i ddarparu ar gyfer dull cyson, cefnogol o reoli tanberfformiad yn y gweithle, gan gynnwys safonau gwaith, cynhyrchiant neu ffactorau galluogrwydd eraill.

Nid yw'n ymdrin a materion disgyblaeth ac ymddygiad, absenoldeb salwch (oni bai bod presenoldeb ar lefel sy'n effeithio ar allu'r gweithiwr i gyflawni eu dyletswyddau) nac amharodrwydd neu wrthodiad gweithiwr i gyflawni eu dyletswyddau at safon ofynnol. Cyfeirer at Weithdrefn Ddisgyblu a/neu Weithdrefn Absenoldeb Salwch yr Awdurdod am ganllawiau pellach ar ddelio gydag unrhyw un o'r materion hyn.

Lluniwyd y Polisi hwn i ddelio'n ffurfiol gyda materion galluogrwydd/perfformiad ac nid yw'n disodli arfarniadau perfformiad rheolaidd.

Adlewyrchir y canllawiau a nodir yng Nghôd Ymarfer ACAS ar Weithdrefnau Disgyblu ac Achwyniadau (11 Mawrth 2015) yn y Polisi hwn.